Umuhanzikazi w’icyamamare muri Afrobeats, Tiwa Savage, yatangaje ko afite gahunda nshya yo kongera kwagura umuryango we. Uyu muhanzi ukunzwe cyane muri Afurika no ku Isi hose, yavuze ko afite inyota yo kongera kubyara, by’umwihariko abana b’abahungu barenze umwe.
Tiwa Savage yemeje ko yahagaritse gahunda yari yarafashe yo kubika intanga ze (egg freezing), ashimangira ko igihe kigeze cyo kongera kwibaruka. Ibi yabigarutseho mu kiganiro yagiranye n’itangazamakuru, avuga ko kuba umubyeyi byamuhaye ishimwe rikomeye mu buzima bwe, bityo akaba yifuza kurushaho kongera icyo gice cy’inkuru y’ubuzima bwe.
Uyu muhanzikazi wubatse izina rikomeye mu muziki wa Afrobeats, amaze imyaka irenga icumi ari umwe mu bakobwa b’intangarugero mu ruganda rwa muzika yo muri Afurika, aho yagiye akora indirimbo zakunzwe ku rwego mpuzamahanga ndetse akanegukana ibihembo bikomeye.
Ku bijyanye n’ahazaza, Tiwa Savage yavuze ko umuryango we ari wo w’ingenzi kurusha ibindi byose, ari na yo mpamvu yahisemo gushyira imbere gahunda yo kongera kwibaruka mu gihe cya vuba.
