Rutahizamu wa APR FC ndetse n’ikipe y’Igihugu y’Amavubi, Mugisha Gilbert uzwi nka Barafinda yasezeranye mu mategeko n’umukunzi we Mpinganzima Josephine bamaze imyaka itatu bakundana.
Ku gicamutsi cyo ku wa Kane, tariki ya 24 Ukwakira 2024, nibwo Mugisha Gilbert na Mpinganzima bahamirije imiryango n’inshuti imbere y’amategeko ko babana akaramata, mu muhango wabereye mu murenge wa Kinyinya, mu karere ka Gasabo.
Ni nyuma y’uko tariki ya 30 Nzeri 2024, hasakaye amafoto ya Mugisha Gilbert yambika impeta uyu mukunzi we bivugwa ko ubu atuye mu gihugu cya Canada.
ku Cyumweru tariki ya 21 Ukwakira, nibwo Mugisha yari yagiye kwerekana umukunzi we mu rugo iwabo.
Aba bombi bamaze imyaka isaga itatu bakundana, ndetse baziranye kuva kera Mugisha Gilbert agikina muri Rayon Sports, kuko bivugwa ko Mpinganzima yari umufana ukomeye w’iyi kipe.
