Uwahoze ari Rutahizamu wa Manchester City na Real Madrid, Robinho, wakatiwe gufungwa imyaka icyenda muri Brésil, azira icyaha cyo gufata ku ngufu, ubu yabaye umutoza w’ikipe imwe muri gereza.
Mu mwaka ushize wa 2024, ni bwo Robinho w’imyaka 40 yahamijwe n’urukiko rwo mu Butaliyani mu 2017 kuba mu gatsiko kafashe ku ngufu umugore w’Umunya-Albania w’imyaka 22 mu 2013.
Nyuma yo guhamywa n’iki cyaha, yatsinzwe ubujurire mu 2020 mbere y’uko Urukiko Rukuru rw’u Butaliyani rugumishaho igifungo cy’imyaka icyenda mu 2022.
Uyu mugabo wafungiwe iwabo muri Brésil, ahabwa uburenganzira bwo gusurwa ndetse akabonana n’abamwifuza, cyane cyane abari abakunzi mu mupira w’amaguru bajya kumusaba kubasinyira ‘autographs’.
Ishami ry’ikinyamakuru CNN rikorera muri Brésil ryavuze ko uyu mugabo uzasohoka muri gereza afite imyaka 50 yatangiye akazi k’ubutoza agakorera muri gereza, hateguwe irushanwa ry’umupira w’amaguru ku bafungiyemo.
Mu rugendo rwe rwo gukina, yatwaye ibikombe bibiri bya La Liga mu myaka ine yamaze muri Real Madrid, mbere yo kugurwa na Manchester City miliyoni 32,5£ [yari menshi icyo gihugu mu Bwongereza) ku munsi wa nyuma w’igura ry’abakinnyi muri Nzeri 2008, ubwo iyi kipe yari imaze kugurwa na Sheikh Mansour.
Nyuma y’imyaka ibiri, Robinho yagiye muri Milan AC, ahamara imyaka itanu mbere yo kwerekeza muri Guangzhou Evergrande yo mu Bushinwa na Clube Atlético Mineiro y’iwabo.
