Perezida wa kera wa Toronto Raptors, Masai Ujiri, yagizwe Intumwa y’Inyungu z’Iterambere Rirambye (SDG Advocate) n’Umunyamabanga Mukuru w’Umuryango w’Abibumbye, António Guterres, mbere y’Inama Rusange ya 80 y’Umuryango w’Abibumbye.
Masai Ujiri, washinze umuryango Giants of Africa ndetse na Zaria Group, akaba yarigeze kuba visi-perezida n’umuyobozi mukuru wa Toronto Raptors, yinjiye mu itsinda ry’abayobozi n’abahindura byinshi ku isi.
Nyuma yo kugenwa, Ujiri yagize ati:
“Siporo ntihuza abantu gusa — ikuraho inzitizi, yubaka ibyiringiro, igahindura n’imiryango yose. Kwinjira mu itsinda ry’Intumwa za SDGs ni icyubahiro gikomeye, kandi nishimiye kuba mu gice cy’ihuriro mpuzamahanga rihuza urubyiruko no guteza imbere impinduka zifatika ku isi yose.”
Itsinda ry’Intumwa za SDGs riyobowe na Minisitiri w’Intebe wa Barbados, Mia Mottley.
Muri uku kwezi, umuryango wa Ujiri Giants of Africa wasoje iserukiramuco rya kabiri ryabereye i Kigali, Rwanda.
Iri serukiramuco rya 2025 ryahuje abasore n’inkumi bagera kuri 320 baturutse mu bihugu 20 bya Afurika, risusurutswa n’abafana barenga ibihumbi 20, rikomatanya basketball, umuziki, imideli n’umuco.
Abanyacyubahiro barimo Kawhi Leonard na Robin Roberts (uzwi mu nkuru za Good Morning America) bitabiriye ibi birori, ndetse n’abahanzi bakomeye nka Ayra Starr, Uncle Waffles na Timaya bararirimba.
Iri serukiramuco ryabaye kandi umwanya wo gufungura ku mugaragaro Zaria Court, agace gashya kigezweho gahuriza hamwe siporo, imyidagaduro n’umuco mu mutima wa Kigali, uyu ukaba umwe mu mishinga ya Masai Ujiri.
