Ikipe y’Igihugu ya Libya yatewe mpaga y’ibitego 3-0 inacibwa amande y’ibihumbi 50$ ku mukino yari kwakiramo Nigeria muri uku kwezi, tariki ya 15 Ukwakira.
Ikipe y’Igihugu ya Nigeria yerekeje muri Libya gukina umukino wo gushaka itike yo kujya mu Gikombe cya Afurika cya 2025, ariko igeze mu Mujyi wa Tripoli ibura uko ikomereza i Benghazi n’imizigo yayo irafatirwa.
CAF yategetse ko Libya iterwa mpaga ndetse Ishyirahamwe rya Ruhago ryayo rigatanga amande y’ibihumbi 50$.
Ni nyuma y’uko iyi kipe ikoze ibinyuranyinje n’amategeko ya CAF agenga imyitwarire mu ngingo yayo ya 31, iya 82 n’iya 151. Amande agomba kwishyurwa bitarenze iminsi 60.
Uyu mwanzuro watumye Nigeria ihita iyobora Itsinda D n’amanota 10 inabona itike ya CAN 2025, ikurikirwa na Bénin ifite atandatu mu gihe u Rwanda rufite amanota atanu. Libya ni iya nyuma mu itsinda n’inota rimwe.
