Cristiano Ronaldo yasutse amarira nyuma y’uko Al-Nassr akinira yatsinzwe na Al-Hilal ku mukino wa nyuma w’Igikombe cy’Umwami wa Arabie Saoudite wabaye ku wa Gatanu.
Ronaldo yapfukamye hasi ararira ubwo Al-Hilal y’abakinnyi icyenda yari imaze gutsinda Al-Nassr penaliti 5-4 nyuma y’iminota 120 yarangiye amakipe yombi anganya igitego 1-1 i Jeddah.
Uyu mukinnyi w’imyaka 39 uheruka gukora amateka yo gutsinda ibitego 35 mu mikino 34 ya Shampiyona ya Arabie Saoudite, yihanganishijwe na bagenzi be bamufashije kugera ku ntebe y’abasimbura.
Kapiteni wa Portugal yatsinze ibitego 58 mu mikino 64 yakiniyemo Al-Nassr kuva ayigezemo muri Mutarama 2023 ku masezerano y’imyaka ibiri n’igice, aho yari avuye muri Manchester United.
Kubura Igikombe cy’Umwami byatumye Ronaldo amara imyaka ibiri y’imikino nta gikombe atwaye muri Arabie Saoudite. Irushanwa rimwe yatwaye muri iki gihugu ni iry’amakipe y’Abarabu [Arab Club Champions Cup] mu mwaka ushize.
Ruben Neves yahushije penaliti ku ruhande rwa Al-Hilal, aba ari na ko bigenda kuri Alex Telles wa Al-Nassr.
Al-Nassr yatsinze izindi penaliti enye zirimo iya Ronaldo mbere y’uko Umunyezamu Yassine Bounou akuramo iya nyuma, afasha Al-Hilal kwegukana igikombe cya kabiri muri uyu mwaka.
Aleksandar Mitrović ni we wari wafunguye amazamu ku ruhande rwa Al-Hilal ku munota wa karindwi mbere y’uko Umunyezamu David Ospina wa Al-Nassr ahabwa ikarita itukura ku munota wa 56.
Ku munota wa 88, Ayman Yahya yatsinze igitego cyatumye amakipe yombi ajya mu minota 30 y’inyongera, ariko hagati Ali Al-Bulayhi na Kalidou Koulibaly ba Al-Hilal bahabwa amakarita atukura ku munota wa 87 n’uwa 90.
