Biragatsindwa kumara amezi menshi ukusanya udufaranga two kugura telefoni y’inzozi zawe, wamara kuyigura ugasanga hari byinshi biyiburamo cyangwa itameze nk’uko wari uyiteze ibyo benshi bahita bita ‘gutuburirwa’.

Hari ibintu byinshi abantu bagenderaho iyo bagiye kugura telefoni cyane cyane iza iPhone birimo nko kureba igihe yakorewe, ubushobozi n’ubuziranenge bya batiri yayo, umwanya w’ububiko, kureba ‘Serial Number’ kugira ngo umenye amakuru y’iyo telefoni n’ibindi.

Ibi akenshi bukunze gukorwa n’abagura telefoni ziba zarakoreshejwe, ubwo ndavuga zimwe ziba zitavuye mu makarito ‘Second hand’.

Hari ikindi kintu ushobora kuba wirengagiza kandi cy’ingenzi cyane, ku buryo ugiye ucyitaho cyazakurinda kuzicuza impamvu wabitse amafaranga bikarangira bikubereye imfabusa.

iPhone zigira imibare igaragaza umwirondoro wihariye ukubiyemo amakuru ya telefoni nk’agace yakorewemo, amakuru y’ibikoresho biyigize [hardware] n’icyiciro iyo telefoni ibarizwamo. Iyi mibare izwi nka ‘Model Number’ mu Cyongereza.

Hamenyerewe ko telefoni z’uruganda rwa Apple zigira ‘Model Number’ ziri mu byiciro bine kandi bifite byinshi bivuze. Hari model number itangizwa n’inyuguti ya ‘M’, indi itangizwa n’inyuguti ya ‘N’, itangwizwa n’iya ‘F’ mu gihe indi model number itangizwa na ‘P’.

Model number itangizwa na ‘M’, iba igaragaza ko iyo iPhone yaguzwe ari nshya ikagurishwa na Apple nyiri zina cyangwa abacuruzi bemewe bakorana n’uru ruganda. Izi aba ari zimwe twita izo mu makarito, kuko ziba ari nshya.

Ku bakunda kugura izakoreshejwe, hari ubwo uzasanga iPhone ugiye kugura ifite model number ya ‘M’, ubwo bizaba bivuze ko iyo telefoni mbere y’uko ikoreshwa yavuye ku ruganda nyirizina. Akenshi izi telefoni ziba zihenze.

Indi model number itangizwa na ‘N’ iba igaragaza ko iyo telefoni ya iPhone yatanzwe nk’isimbura indi yagize ikibazo iba yaragurishijwe bwa mbere. Itangwa na Apple binyuze muri AppleCare cyangwa serivisi ya garanti.

Aha ni kwakundi uba ufite telefoni ikagira ikibazo ariko kuko iri muri garanti, ukaba wayisubizayo bakaguha indi. Iyo telefoni yindi uba ugiye guhabwa yo gusimbura iya mbere ihabwa model number ya ‘N’.

Akenshi iyi telefoni uhabwa ntabwo iba ari nshya kuko ishobora kuba imwe mu zasubijwe ku ruganda ngo zivugururwe. Ariko na zo ziba zifitemo gukomera kuko ziba zongeye kwitabwaho.

Indi telefoni ni iPhone ifite model number itangizwa na ‘F’. iyi ‘F’ igaragaza ko iyi telefoni yasubijwe ku ruganda, igakorerwa amavugurura nyuma Apple ikongera kuyigurisha.

Nubwo iyi telefoni iba igura amafaranga make, ariko iba yarakoreshejwe mbere, nyirayo akayisubiza ku ruganda wenda ashaka kugura iyisumbuyeho cyangwa kubera iyindi mpamvu, hanyuma Apple ikayivugurura, ikongera gushyirwa ku isoko.

Bivuze ko imikorere yayo utayizera 100% cyangwa utakumva ko ufite telefoni nshya.

kwitondera mu gihe ugiye kugura telefoni, itangizwa n’inyuguti ya ‘P’. Iyi igaragaza ko iyo iPhone iba ifite imiterere yihariye.

Izi ni telefoni akenshi zikoreshwa n’ibigo binini, aho bijya ku ruganda rwa Apple bigasaba ko wenda bakora iPhone zitabasha kwakira imbuga nkoranyambaga nka Instagram, WhatsApp, Facebook n’izindi.

Ibi akenshi bikorwa nk’iyo zigiye guhabwa abakozi ngo bazifashishe mu bikorwa by’akazi birebana no guhamagara cyangwa kwitaba telefoni bisanzwe.

Izi telefoni zihabwa imiterere idasanzwe mu zindi. Amahirwe n’uko ishobora guhindurwa igahabwa ububasha bwisumbuye, ariko na none ibyago ni ugusanga yaragabanyirijwe ubushobozi bwayo kubera impamvu zinyuranye.

Iyi yo ugomba kuyitondera kuko ushobora kuririra mu myotsi usanze itajyamo nka WhatsApp cyangwa ikindi kintu waba wifuza. Ntizikunze kuboneka ku isoko kereka nk’iyo yagurishijwe ikuwe mu kigo cyifuje ko yahindurwa.

Kumenya no gusobanukirwa izi model number ntibivuze ko nuhitamo neza uzaba utomboye telefoni nzima kuko nk’uko twangiye inkuru, hari byinshi uba ugomba kuzirikana kugira ngo wirinde kurara mu gahinda. Iki ni kimwe muri byinshi byo kuzirikana.

Nomcebo Zuma, umukobwa wa Jacob Zuma wahoze ari Perezida wa Afurika y’Epfo, yerekanywe nk’ugiye kuba umugore mushya w’Umwami Mswati III wa Eswatini.

Mu ijoro ryo ku wa Mbere tariki ya 2 Nzeri ni bwo Nomcebo yerekanwe, ubwo muri Eswatini hasozwaga ibirori gakondo byo kwerekana ugomba kuba umugore mushya w’umwami bizwi nka Umhlanga. Ni ibirori mu busanzwe bimara iminsi ine.

Ku munsi wa nyuma wabyo byitabiriwe n’abantu barenga 5,000; barimo Umwami Misuzulu KaZwelithini w’Abazulu bo muri Afurika y’Epfo na Ian Khama wahoze ari perezida wa Botswana.

Amashusho y’ikinyamakuru Times of Eswatini yerekana Nomcebo Zuma w’imyaka 21 y’amavuko arimo kubyina indirimbo gakondo ari kumwe n’abandi bagore benshi muri ibi birori bifatwa nka kimwe mu biranga umuco w’ubwami bw’Aba-Swati.

Ibinyamakuru byo muri Afurika y’Epfo bivuga ko Umwami Mswati yizeje Jacob Zuma inkwano y’inka 100 na miliyoni zigera kuri ebyiri z’ama-Rand (arenga miliyoni 150Frw).

Ikinyamakuru kigenga Swaziland News kivuga ko cyabonye inyandiko y’ibanga rikomeye yo mu ishami ry’imari ry’ibwami ivuga ko Nomcebo Zuma we azahabwa miliyoni 3 z’ama-Rand (arenga miliyoni 225 Frw) nk’impano “y’umukunzi we” Umwami Mswati witezweho kuba umugabo we.

Mswati III uherutse i Kigali aho yari yitabiriye umuhango w’irahira rya Perezida Paul Kagame, ategeka Eswatini kuva mu 1986.

Icyakora anengwa kubaho ubuzima bw’agatangaza mu gihe igice kinini cy’abaturage b’iki gihugu babayeho mu bukene.

Nomcebo Zuma witezwe kuba umugore we mushya na we ava mu muryango wemera gushaka abagore benshi.

Se Jacob Zuma w’imyaka 82 wayoboye Afurika y’Epfo hagati ya 2009 na 2018 mbere yo gusimburwa na Cyril Ramaphosa, yashakanye n’abagore batandatu ndetse ubu afite bane n’abana barenga 20, nk’uko ikinyamakuru The Guardian cyo mu Bwongereza kibivuga.

Umukinnyi wasiganwaga ku maguru w’umunya-Uganda yapfuye nyuma y’iminsi micye arembeye mu bitaro byo muri Kenya, amaze gutwikwa n’uwahoze ari umukunzi we wamusutseho lisansi.

Ishyirahamwe ry’umukino wo gusiganwa ku maguru muri Uganda ryatangaje ku rubuga X ko ribabajwe “no gutangaza urupfu rw’umukinnyi wacu” Rebecca Cheptegei.

Iri shyirahamwe rivuga ko Cheptegei yapfuye “kare muri iki gitondo bivuye ku rugomo rukorerwa mu ngo yakorewe”.

Umuryango we ntabwo uremeza uru rupfu ariko Dr Owen Menach ukuriye ibitaro bya Moi Teaching and Referral Hospital mu mujyi wa Eldoret yabwiye ibinyamakuru byaho ko Rebecca yapfuye nyuma y’uko ingingo zose zo mu mubiri we zihagaze.

Rebecca yari asanzwe ari umusirikare mu ngabo za Uganda, kandi ni we mugore muri icyo gihugu ufite umuhigo wo kwiruka marathon akoresheje 2:22:47, umuhigo yaciye mu 2022 muri marathon ya Abu Dhabi muri United Arab Emirates.

Rebecca wari ufite imyaka 33, yarangije ari uwa 44 mu gusiganwa marathon mu mikino Olempike iheruka i Paris mu Bufaransa.

Abategetsi bavuga ko ku cyumweru gishize ubwo yari avuye gusenga we n’abana be babiri, yasagariwe na Dickson Marangach umugabo wahoze ari umukunzi we, ari iwe mu mujyi muto wa Endebess ari naho yitoreza mu burengerazuba bwa Kenya.

Marangach yamusutseho lisansi maze aramutwika nyuma y’intonganya hagati yabo, nk’uko byatangajwe n’abaturanyi babo.

Cheptegei yatabawe n’abaturanyi ajyanwa ku bitaro ariko yari yagize ubushye bugera kuri 80% by’umubiri we, nk’uko abaganga babitangaje.

Cheptegei, ukomoka mu karere ko hakurya y’umupaka muri Uganda, bivugwa ko yari yaraguze ubutaka mu ntara ya Trans Nzoia ya Kenya akabwubakamo inzu. Ako gace karimo ibigo byinshi abasiganwa ku maguru bitorezamo.

Raporo yatanzwe n’abategetsi baho ivuga ko we n’uwo wahoze ari umukunzi we bagiye bagirana ubushyamirane kubera ubwo butaka.

Se wa Cheptegei, Joseph Cheptegei, mu ntangiriro z’iki cyumweru yabwiye abanyamakuru ko uwo mugabo yashakaga kuriganya ubutaka umukobwa we. Yavuze ko asenga ngo “umukobwa wanjye ahabwe ubutabera”.

Marangach na we wahiye ku rugero rwa 30% mu gutwika Rebecca, na we muri iki cyumweru yari arimo kuvurirwa ku bitaro bimwe na Rebecca byo mu mujyi wa Eldoret, ari na byo bikuru muri ako gace, nk’uko abaganga babitangaje.

Ishyirahamwe ry’umukino wo gusiganwa ku maguru rya Uganda rivuga ko “twamaganye ibintu nka biriya kandi turasaba ubutabera”.

Mu ntangiriro z’iki cyumweru polisi ya Kenya yatangaje ko irimo gukora iperereza ku byabaye.