Umuhanzi mu ndirimbo zo kuramya no guhimbaza Imana, Richard Nick Ngendahayo, yahaye Umunyarwenya Kaduhire Kadudu ibihumbi 500 Frw nyuma y’uko uyu mukobwa ageze ku rubyiniro akahava adasoje kubara inkuru yari yateguriye abitabiriye igitaramo cya Gen Z Comedy Show, kubera amagambo ashaririye yabwiwe ari ku rubyiniro.

Iki gitaramo cyabereye muri Camp Kigali, mu ijoro ryo ku wa Kane, tariki ya 13 Ugushyingo 2025.
Umunyarwenya Kadudu ubwo yari ku rubyiniro, yakomoje ku nkuru zitandukanye zirimo n’iyo yavuzemo ko mu bitabiriye iki gitaramo yabonyemo umukobwa ufite ikimero giteye amabengeza ariko yamubaza uturere tugize u Rwanda akamusubiza ko ari tune [ubusanzwe u Rwanda rugizwe n’uturere 30].

Kadudu yakomeje ati “Ariko namwumvise, ntabwo Imana yaguha ikibuno cyiza, imiterere myiza ngo nirangiza iguhe n’ubwenge.”

Akivuga atyo, umwe mu bitabiriye iki gitaramo yahise avuga mu ijwi rirenga ati “Wowe se ko Imana yabikwimye byose?”

Nyuma yo kubwirwa ayo magambo, Kadudu yabyegereje umutima cyane ndetse atangira gusuka amarira, ahita avuga ko bidakwiye ko abantu baba baje mu gitaramo bamera nk’abahanganye n’abanyarwenya.

Kadudu yahise ava ku rubyiniro ariko asiga abitabiriye iki gitaramo bamukomera amashyi y’urufaya.
Ubwo Richard Ngendahayo Nick yari ahamagawe ku rubyiniro mu gace kahariwe kuganiriza abitabiriye iki gitaramo kazwi nka “Meet me Tonight”, yahise asaba ko Umunyarwenya Kadudu yamusangayo.

Kadudu yahamagawe maze akihagera Ngendahayo Richard ahita amuhagurukira, amuha umwanya yicara mu ntebe yari yateguriwe uyu muhanzi.

Ngendahayo yabwiye Kadudu ko aremye mu ishusho y’Imana bityo ko adakwiye kurira. Yamubajije niba afite akazi, Kadudu ati “Nta kazi ngira.”

Yahise amubaza icyo yumva yakora aramutse ahawe igishoro, mu gusubiza uyu munyarwenya avuga ko yumva yacuruza ibiribwa.

Ngendahayo yahise abwira Kadudu ati “Uwaguha ibihumbi 500 Frw byagufasha?” Mu gusubiza Kadudu wari waganjwe n’amarangamutima, yabuze icyo avuga arongera araturika ararira.

Umuhanzi Ngendahayo yahise amubwira ko amwemereye ibihumbi 500 Frw ndetse amusaba kwegera umugore we ahita ayamushyikiriza ako kanya.

Kadudu yanahawe itike yo kuzicara mu mwanya w’icyubahiro, mu gitaramo “Niwe Healing Concert”, Ngendahayo azakorera muri BK Arena, tariki 29 Ugushyingo 2025.

Mu butumwa bwe, Ngendahayo yabwiye abitabiriye Gen Z Comedy Show by’umwihariko urubyiruko kwishimira ko ruri mu gihugu kiruha ijambo, anarusaba kubyaza umusaruro ayo mahirwe kugira ngo basigasire ibyagezweho, na rwo rwiteze imbere.

Umuhanzi Florien Uworizagwira benshi bazi nka Yampano, yasabye imbabazi abakunzi be nyuma y’amashusho y’urukozasoni ye yagiye hanze.

Uyu muhanzi yifashishije urukuta rwe rwa Instagram, yasangije ibaruwa ndende igenewe abafana be, abakunzi b’umuziki muri rusange ndetse n’umuryango Nyarwanda, abasaba imbabazi.

Yatangiye agira ati “ Mbere na mbere, ndashaka gusaba imbabazi bivuye ku mutima ku bw’agahinda n’umubabaro byatewe n’ibyabaye vuba aha byo gushyira ahagaragara videwo yihariye ku buryo budakurikije amategeko.”

Yakomeje agira ati “ Byabaye ihohoterwa rikomeye kandi ribabaza cyane, kandi ndicuza nanasaba imbabazi uwariwe wese iyi video yaba yagezeho, abafana banjye, itangazamakuru ndetse n’umuryango wacu w’Abanyarwanda dusangiye ufite indangagaciro zo kwiyubaha.”

Uyu muhanzi yakomeje asaba abagifite amashusho y’ubwambure bwe kurekeraho kuyakwirakwiza kuko bihabanye n’indangagaciro z’umuzo Nyarwanda ndetse bikaba ari no kumwicira izina rye ry’ubuhanzi.

Ati “Ndasaba buri wese, cyane cyane abashobora kuba bagisangira cyangwa bakwirakwiza videwo, kubihagarika. Ibikorwa nk’ibi ntabwo byemewe ahubwo binyuranyije n’amategeko, kuko , bikomeza kwangiza ubuzima bwite, ni isura yange nk’umuhanzi. Twibuke umuco wacu w’ubumuntu dusangiye nk’Abanyarwanda, aho duterana inkunga aho gusenyana.”

Yampano ni umwe mu bahanzi bagezweho muri muzika Nyarwanda, uyu musore akunzwe mu ndirimbo zirimo; Sibyanjye, Uzakunde, Ngo n’izindi.

Umuraperi Karangwa Lionel benshi bazi nka ‘Lil G’, yateye imitoma umukunzi we Emilia wo muri Pologne, bitegura kurushinga muri 2026.

Uyu muhanzi abinyujije ku rukuta rwe rwa Instagram, yasangije abamukurikira barenga ibihumbi 30, ifoto ye arikumwe na Emilia, maze ayiherekesha amagambo yuje imitoma ari mu rurimi rw’icyongereza.

Ati “Warakoze Emilia kunkunda ntacyo unca, nabaye kuri uyu mubumbe ariko ibyo wanyeretse byarampinduye mba umugabo mwiza ugomba urukundo rwinshi umukunzi we.”

Lil G na Emilia bamenyanye muri 2022 ubwo uyu muhanzi yimukiraga muri Pologne, nyuma yaho binjiye mu nzira y’urukundo rwaje gukomera ndetse kuri ubu bakaba bitegura gukora ubukwe muri 2026.

Lil G ubwo yari akiba mu Rwanda yakanyujijeho n’abakobwa batandukanye barimo umunyamakuru Gigy Kate, aho uyu muraperi yigeze gutangaza ko bakundanye bakiga mu mwaka wa Kane w’amashuri yisumbuye, Kate we yiga mu mwaka wa mbere.

Uyu muraperi kandi mu 2016 yarikoroje ku mbuga nkoranyambaga, nyuma yo gusangiza abamukurikira amafoto ye n’umurusiyakazi w’imyaka 45 y’amavuko bari mu rukundo icyo gihe.

Urukundo rwabo rwarambye nkumuriro w’amashara, kuko nyuma y’amezi atanu gusa buri umwe yaranyuze inzira ye.

Lil G asanzwe ari umubyeyi aho afite umwana umwe w’umukobwa witwa Leila yabyaranye na Umutoni Diane.

Nyuma y’imyaka 12 abarizwa mu Bwongereza aho yagiye kwiga no kuhatura, umuhanzi Kitoko Bibarwa yatashye mu Rwanda burundu. Yageze ku Kibuga cy’Indege Mpuzamahanga cya Kigali mu gitondo cyo ku wa 9 Ugushyingo 2025, arira amarira y’ibyishimo ubwo yari ageze iwabo.

Mu magambo yuje amarangamutima, Kitoko yagize ati: “Muranyihanganira ntabwo ndi buvuge byinshi kubera amarangamutima mfite, nishimiye gutaha. RwandAir ni ubwa mbere nari nyigenzemo, serivisi bampaye byanyeretse ko ndi iwacu.”

Uyu muhanzi wamenyekanye mu ndirimbo Ikiragi ategerejwe mu gitaramo kizahuriramo n’umuhanzi w’icyamamare Davido, kizabera i Kigali ku wa 5 Ukuboza 2025.

Aganira n’abanyamakuru, Kitoko yavuze ko gutaha bitari ibintu bigoye, ahubwo icyari kigoye ari ukuva mu Rwanda mu myaka yashize.

“Icyemezo kigoye si ugutaha, ahubwo ni ukuva aho wakuriye. Ndabona mwese mukinyibuka, biranezeza.”

Nubwo atashye burundu, Kitoko yatangaje ko ataraza guhagarika umuziki, ahubwo azawukomeza  n’ibindi bikorwa by’akazi ashobora kwinjiramo.

“Umuziki nzawukomeza, ariko nanone nshaka kureba n’ibindi nakora. Njye aho hari inyungu niho nakwerekeza.”

Ku bijyanye n’amakuru yavugaga ko ashobora kuba atashye mu rwego rwo gutegura ubukwe, yasubije aseka ati:

“Ibyo si byo binzanye, ariko binabaye waba ari umugisha.”

Kitoko yaherukaga mu Rwanda mu 2017, ubwo yari mu bikorwa byo kwamamaza Perezida Kagame. Yize Politike muri London South Bank University no muri London Metropolitan University aho yarangije icyiciro cya gatatu cya Kaminuza.

Ubu, nyuma y’imyaka 12 y’ubuzima bwo hanze, Kitoko yongeye guhumeka umwuka w’i Kigali, ashimangira ko yagarutse nk’umuhanzi, nk’Umunyarwanda, kandi nk’umwana w’iwabo.