Turahirwa Moses wa Moshions yongeye kubura intambara y’amagambo kuri B Threy nyuma y’uko mu minsi ishize uyu muraperi yamwibasiye amushinja gushaka gushora abahanzi mu bikorwa by’abaryamana bahuje ibitsina.

B Threy wigeze gukoranaho na Turahirwa mu kwamamaza imyenda ye, aherutse guteguza kuvugisha ukuri ku gukururira abahanzi mu cyobo amushinja kubagushamo ababeshyabeshya.

Ni amagambo yunganiraga Ish Kevin wari wikomye Turahirwa amusaba kutazongera kumuvugaho kuko nta bushuti bafitanye.

Mu magambo ye B Threy yagize ati “Ish Kevin ufite ukuri n’undi muhanzi yumvireho. Rekera aho gukururira abahanzi mu cyobo wagushijemo abandi ubabeshyabeshya, ndaza gushyira hanze ukuri, nturi mwiza ufite ibibazo n’ishusho ushaka kwambika urubyiruko itari nziza.”

B Threy abajijwe niba ataba ari kuvuga ibi kuko wenda imikoranire yabo itagenze neza, yagize ati “Ni umwe mu bantu babi bo gukorana ubucuruzi, ni ukwihisha mu buhanzi ngo bamubone muri iyo shusho kuko byari bigiye kumbaho n’undi byamubaho ariko mukeneye kumenya ukuri.”

Abinyujije ku mbuga nkoranyambaga akoresha, Turahirwa yavuze ko yahisemo gukura B Threy mu bo akurikira ndetse n’abamukurikira ku mbuga nkoranyambaga kuko yamututse amwibutsa ko ibyo arimo ari umurengwe usiga inzara.

Nyuma y’ubu butumwa Turahirwa yatumye kuri B Threy amusaba kurekera aho kumuvuga bitaba ibyo bakazahurira kuri Moshions byaba ngombwa akamukura n’amenyo.

Ati “Mumugire inama tuzahurire ku rukiko rwa Moshions mukure amenyo.”

Fred Mugisha Robinson wamamaye nka Eleement muri muzika nyarwanda yasobanuye inkomoko y’icyitwa “Afrogako”, avuga ko ari imicurangire mishya cyangwa ikirungo ashaka kongera mu muziki ukorerwa mu Rwanda ukagira umwihariko.

Ubwo Element yamurikaga integuza za Afrogako hari hashize amezi atatu studio ya Country Records imuritse indirimbo ya mbere yiswe “Abahungu” .

Iyo njyana Country Records yemeje ko ariyo Afrogako ndetse ari igitekerezo bwite cya nyiri iyi studio (Noopja) aho kuba icya Element nk’umwana bareze bakamukuza muri muzika.

Element na we uvuga ko ari we wazanye igitekerezo cy’iyi Afrogako , mu kiganiro yagiranye na 1:55AM Media, yasobanuye aho inkomoko yayo gusa akemeza ko yafatanyije na Noopja kwandika ijambo “Afrogako”.

Ati “Navuze Afrogako mu 2020 kuko ni igitekerezo nagize nkiri ku ishuri bitewe n’uko nabyinaga imbyino za Kinyarwanda.”

“Nkiri mu mashuri yisumbuye mu mwaka wa kane natangiye gukunda ibintu bya Kinyarwanda gusa mu mutwe wanjye natangiye kugira ikintu cyo gushaka guhuza gakondo n’ibyo tubyina, mbihuza n’imicurangire igezweho kuburyo byaguka bikaba byajya n’ahandi nko mu tubyiniro ariko byahise bincaho kuko byari bindushije ubwenge cyane.”

Yavuze ko mu 2020 aribwo yaganirije Noopja bahuza ibitekerezo, bayita Afrogako.

Ati “Twarakoranye ntabwo ari we wayikoze, ni iyanjye kuko ninjye wazanye icyo gitekerezo.”

Producer Element avuga ko ibyo yakoze nta kintu kidasanzwe yaremye ahubwo yahuje injyana zari zisanzwe zihari bityo buri muntu wese yemerewe kuba yayikora.

Ati “Njyewe naravugaga nti ni gakondo yacu uyivanze na Afrobeats ihari, urumva ni ibintu byari bisanzwe bihari ntabwo ari ibintu nahanze kuva hasi, kuko muri iki gihe tugezemo nta kintu batahanze ahubwo ni ukubihuza kugira ngo ukore ibindi bintu bishyashya.”

Element yakomeje avuga ko azakomeza gukora n’izindi ndirimbo ziri mu njyana zitandukanye ndetse iby’Afrogako biramutse bimunaniye nabyo yabireka akikorera ibindi.

APR FC na Rayon Sports zigiye gusogongera Stade Amahoro nshya imaze igihe ivugururwa mu mukino uteganyijwe tariki ya 15 Kamena 2024 saa kumi n’imwe z’umugoroba.

Ni umukino wateguwe muri gahunda yiswe ‘Umuhuro mu Amahoro’ mu rwego rwo gufasha abakunzi b’umupira w’amaguru kwishimira iki gikorwaremezo cyabahariwe.

Icyakora uyu mukino ntabwo ari uwo gutaha iyi stade ku mugaragaro kuko izatahwa nyirizina tariki 4 Nyakanga 2024 mu birori byo kwizihiza imyaka 30 u Rwanda rumaze rwibohoye.

Kwinjira kuri uyu mukino ni 1000 Frw ndetse n’ibihumbi 10 Frw mu myanya y’icyubahiro.

Icyakora uyu mukino uzaba ufunguye ku makipe yombi kuko yemerewe kuzakoresha abakinnyi bose bafite yewe n’abari mu igeragezwa cyane ko aribyo bihe arimo.

Stade Amahoro nshya ifite ubushobozi bwo kwakira abantu bicaye ibihumbi 45. Hateganyijwemo ibyumba bizajya bikorerwamo n’abanyamakuru mu kazi kabo, bitandukanye n’aho baba bakorera hejuru muri stade mu gihe bari kureba umukino.

Amakipe azaba afite ahantu habiri hatandukanye yinjirira kuko aba agomba kwinjira adahuye. Ifite urwambariro rushobora kwakira amakipe ane icya rimwe, ni ukuvuga abiri agiye gukina n’andi ashobora gukina nyuma yaayo.

Ku bijyanye n’ikibuga, cyararangiye, kuko ubwatsi buri kubungabungwa kugira ngo bukure neza.

Gateka Esther Brianne wamenyekanye mu ruganda rw’imyidagaduro nka Dj Brianne yabatijwe mu mazi menshi.

Dj Brianne umaze kubaka izina mu kuvangavanga imiziki, yabatijwe kuri iki Cyumweru tariki ya 9 Kamena 2024 muri Elayono Pentecost Blessing Church.

Akaba yabatijwe na Prophet Ernest Nyirindekwe, ni nyuma y’igihe gito ahishuye ko agomba kubatizwa akavuka bushya.

Abatijwe nyuma y’iminsi amaze kubagwa aho yabazwe inshuro ebyiri, bivugwa ko yari afite uburwayi bwo mu nda ari bwo yabazwe.

Dj Brianne ni umwe mu gitsina gore kirwanyeho akaba amaze kugira aho agera mu gihe hari igihe yagezemo nta cyizere cy’ubuzima bitewe n’ubuzima bushaririye yakuriyemo ari naho yakuye igitekerezo cyo gushinga umuryango yise La Perle Foundation wita ku bana bari mu buzima bwo ku muhanda.