Maroc yatsinze Sénégal penaliti 5-3 nyuma yo kunganya igitego 1-1 mu minota 120, isanga Madagascar ku mukino wa nyuma wa CHAN 2024 uzabera i Nairobi ku wa Gatandatu, tariki ya 30 Kanama.
Iki gihugu cyo mu Majyaruguru ya Afurika, cyegukanye iri rushanwa inshuro ebyiri, cyasezereye Sénégal yari ifite igikombe giheruka.
Maroc yabigezeho nyuma yo gutsinda penaliti 5-3 ubwo amakipe yombi yari asoje iminota 30 y’inyongera nta yongeye kureba mu izamu ry’indi. Ni mu gihe iminota 90 yabanje kuri Mandela National Stadium i Kampala, yarangiye ari igitego 1-1.
Myugariro Layousse Samb yari yafunguye amazamu ku ruhande rwa Sénégal ku munota wa 16, ariko ntibyarambye kuko Sabir Bougrine yishyuriye Maroc nyuma y’iminota irindwi gusa.
Maroc yinjije penaliti zayo zose zatewe na Mohamed Hrimat, Oussama Lamlioui, Ayoub Khairi, Anas Bach na Youssef Mehri naho Sénégal ihusha imwe yatewe na Seyni Mbaye Ndiaye igafata umutambiko w’izamu.
Ni mu gihe Vieux Cissé, Baye Ciss na Daouda Ba bari batsinze penaliti eshatu zabanje ku ruhande rwa Sénégal.
Ku mukino wa nyuma uzabera kuri Moi International Sports Center Kasarani muri Kenya ku wa Gatandatu, Maroc izahura na Madagascar yahagaze ku nshuro ya mbere.
Madagascar yarenze ½ nyuma yo gutsinda Sudani igitego 1-0 hitabajwe iminota 120 mu mukino wabereye kuri Benjamin Mkapa National Stadium i Dar es-salaam.
Iminota 90 isanzwe yari yarangiye ari ubusa ku busa, ndetse Madagascar yakinaga ari abakinnyi 10 mu kibuga nyuma y’uko Fenohasina Razafimaro yahawe ikarita itukura ku munota wa 79 akoze ikosa rya kabiri rihanishwa ikarita y’umuhondo.
Byasabye gutegereza umunota wa 116, Toky Rakotondraibe atsinda igitego kitazibagirana mu mateka y’umupira w’amaguru wa Madagascar.
Umukino w’umwanya wa gatatu uzakinwa ku wa Gatanu, tariki ya 29 Kanama 2025, kuri Mandela National Stadium i Namboole aho uzahuza Sudani na Sénégal.
