Barack Obama abinjujije ku rubuga rwitwa X yanditse ko ashyigikiye Kamala Harris mu matora ya Perezida wa Leta Zunze Ubumwe z’Amerika, ategerejwe mu Ugushyingo 2024.
Obama wabaye Perezida wa 44 wa Leta Zunze Ubumwe z’Amerika ndetse akaba umwirabura wa mbere wayoboye iki gihugu mu mateka, yanditse ko ashyigikiye Kamala Harris mu matora ya Perezida wa Leta Zunze Ubumwe z’Amerika.
Mu butumwa yanyujije kuri X, Obama yanditse ati,”Vuba aha muri iki cyumweru, njye na Michelle (Umugore wa Obama) twahamagaye inshuti yacu Kamala Harris. Twamubwiye ko azaba Perezida mwiza wa Leta Zunze Ubumwe z’Amerika kandi ko tumuri inyuma.”
Yakomeje agira ati,”Muri ibi bihe bitoroshye igihugu cyacu kirimo, tugiye gukora ibishoboka byose azatsinde amatora mu Ugushyingo. Twizeye ko mutwiyungaho.”
Kamala Harris ni umunyapolitikekazi w’imyaka 59 usanzwe ari Visi Perezida wa Leta Zunze Ubumwe z’Amerika.
Harris ahabwa amahirwe yo kuziyamamaza mu matora yo mu Ugushyingo ku mwanya wa Perezida ahagarariye ishyaka rya Democratic Party.
Amahitamo ya mbere y’uwagombaga guhagararira iri shyaka yari Perezida uriho kuri ubu Joe Biden w’imyaka 81, gusa mu minsi yashize nibwo yivanye mu matora nyuma yo kubisabwa ku bwinshi n’abanyeshyaka ba Democratic Party.
Iki nicyo cyatumye Kamala Harris ariwe uhabwa amahirwe yo gusimbura Joe Biden kuri uwo mwanya, akazahangana na Donald Trump mu matora.
