Abakinnyi umunani ni bo baboneye I Kigali itike yo gukomeza mu mikino ya nyuma y’irushanwa rya PFL Africa.
Ni nyuma yo kwegukana intsinzi mu mikino ya ½ yabereye muri BK Arena ku mugoroba wo ku wa Gatandatu, tariki ya 18 Ukuboza 2025.
Iyi mikino yari igizwe n’ibyiciro bine by’iteramakofi, ari byo Featherweight, Bantamweight, Welterweight, na Heavyweight.
Mu gice cya Featherweight, Majorique wo muri Cameroun yatsinze Mohamed Camara wo muri Guinea ku gace ka 3-0, bityo ahita abona itike yo guhura na Wasi Adeshina w’Umunya-Nigeria watsinze Dwight Dassi wo muri Liberia ku gace ka 3-0.
Mu kindi gice cya Bantamweight, Karim Henniene wo muri Algeria yakubitiye Boulie Godogo wo muri Angola ku gace ka kabiri, akazahura na Nkosi Ndebele wo muri Afurika y’Epfo, nyuma yo gutsinda Simbarashe Hokonya wo muri Zimbabwe ku gace ka 2-1.
Muri Heavyweight, Abraham Bably w’Umunya-Côte d’Ivoire yatsindiye mu gace ka kabiri Joffie Houlton w’umunya-Nigeria, akaba azahura na Justin Clark wo muri Afurika y’Epfo, watsinze Maxwell Djantou Nana wo muri Cameroun.
Naho muri Welterweight Yabna N’tchala wo muri Cameroun yatsinze mugenzi we Emilios Dassi uduce 3-0, abona itike yo guhura na Shido Boris wo muri Angola watsinze Octave Ayinda.
U Rwanda rwari ruhagarariwe na James Bizimungu Opio, wakinnye na Isaac Omeda wo muri Uganda. Bombi basoje bafite amanota angana (28), ariko Isaac Omeda w’Umunya-Uganda ni we wabashije gukomeza.
Imikino ya nyuma ya PFL Africa izabera muri Bénin mu Kuboza 2025, aho abazayegukana bazahembwa ibihumbi 100$ ndetse n’imikandara y’irushanwa, biba ikimenyetso cy’uko begukanye ku nshuro ya mbere iri rushanwa.
