Kuva mu gitondo cyo kuri uyu wa mbere tariki 18 Werurwe 2024, Alyn Sano yarikoroje ku mbuga nkoranyambaga kubera amafoto yashyize hanze yambaye utwenda tw’imbere ari ku mazi.
Uyu muhanzikazi uri kubarizwa muri Tanzania yavuze ko aya mafoto yayafashe ubwo yari ageze muri iki gihugu.
Yagiye muri Tanzania gufata amashusho y’indirimbo yakoranye na Loui uri mu bahanzi bagezweho.
Loui wakoranye indirimbo na Alyn Sano ni umwe mu bahanzi bahanzwe amaso muri Tanzania kuko yanakoranye indirimbo ‘Selema’ na Musa Keys wamamaye mu ndirimbo Unavailable na Davido, mu gihe yari asanganywe iyitwa Hennessy yasohoye mu 2021 igakundwa.
Alyn Sano yagize ati “Ndi gufata amashusho y’indirimbo nakoranye na Loui, ni umuhanzi mwiza muri iki gihugu ku buryo numva ko igihe izaba isohotse izanyura abakunzi banjye.”
Nta byinshi Alyn Sano yigeze yifuza kuvuga ku mafoto ye akomeje guca ibintu ku mbuga nkoranyambaga, cyane ko ahamya ko yafashwe ubwo yari ku mucanga kandi yumva nta kosa ribirimo kwifotoreza ku mazi.
Iyi ndirimbo nshya ya Alyn Sano izaba ikurikira album ‘Rumuri’ aherutse gushyira hanze mu minshi ishize.
