Umwongereza Hudson Harry yegukanye gusiganwa mu muhanda ‘road race’ mu bahungu batarengeje imyaka 19, ku munsi wa gatandatu wa Shampiyona y’Isi y’Amagare.
Kuri uyu wa gatanu, tariki ya 26 Nzeri 2025, Shampiyona y’Isi y’Amagare yakomeje, aho ku saa 11:30, abahungu batarengeje imyaka 19 bari bashoje gusiganwa mu muhanda, bakaza gukurikirwa n’abahungu batarengeje imyaka 23 bari busiganwe guhera ku isaha ya saa 12:00.
Isiganwa rya mbere ryari ibilometero 119,3, ritangirira kuri Kigali Convection Center, abasiganwa bagakora inshuro ‘Lap’ umunani kugirango iyi ntera yuzure.
Umwongereza Hudson Harry w’imyaka 18 niwe wahize abandi aho yashoje intera yose yari yagenwe akoresheje amasaha 2, iminota 33 n’amasegonda 16.
Yakurikiwe n’Umufaransa, Blanc Johan waje ku mwanya wa kabiri, yarushije amasegonda 40, na Jackowiak Jan ukomoka muri Poland, waje ku mwanya wa gatatu, arushwa amasegonda 42.
Ku nshuro ya mbere Umuyarwanda yabashije gusoza isiganwa ari ku mwanya wa 66, aho yashoje ibilometero byagenwe akoresheje amasaha 3, iminota 9 n’amasegonda 32, ni mu gihe undi Munyarwanda Nkurikiyinka Jackson atabashije gusoza isiganwa.
Hudson usanzwe akinira ikipe ya Liège-Bastogne-Liège yo mu Bubiligi, ariko waje mu Rwanda hagarariye ikipe ya Harrogate Nova Race yo mu Bwongereza, yavuze ko iri siganwa ritari ryoroshye ariko ari ishema kwegukana umudali wa Zahabu.
Ati” Numvaga ndi bufatwe n’agace ka nyuma, ariko nabashije gukomeza gusiganwa kugeza nsoje, byankomereye cyane ku kazamuko ka nyuma, gusa gutsindira umudali w’Isi ni ibintu biteye ishema cyane.”
Isiganwa rigiye gukomeza ubwo abahungu batarengeje imyaka 23, baraba basiganwa mu muhanda ‘road race’.
