FC Barcelona yavuye inyuma inyagira Real Madrid ibitego 5-2, mu mukino wa nyuma w’Igikombe cya Supercopa de España wabereye muri Arabie Saoudite ku Cyumweru, tariki ya 12 Mutarama 2025.
Uyu wari umukino w’imbaraga ku mpande zombi kuko aya makipe y’amakeba, yongeye kubura ihangana ryayo ryahozeho kuva mu 1902 ubwo aya makipe yahuraga bwa mbere.
Ku munota wa gatanu gusa w’uyu mukino, Kylian Mbappe yari yamaze gufungura amazamu ku gitego yatsinze amaze gucenga ubwugarizi bwa FC Barcelone kugeza ku munyezamu Wojciech Szczęsny.
Ntibyatinze ku wa 22, Lamine Yamal yishyura iki gitego nyuma y’umupira mwiza yaherejwe na Robert Lewandowski, wanatsinze icya kabiri kuri penaliti yabonetse ku munota wa 36.
Igitego cya gatatu cya FC Barcelona cyagiyemo ku munota wa 39 gitsinzwe na Raphinha, umukino wongerwaho iminota icyenda ku gice cya mbere yanabonetsemo icya kane cyinjijwe na Alejandro Balde.
Igice cya kabiri cyabonetsemo igitego cya gatanu cyatsinzwe na Raphinha wabaye umukinnyi mwiza muri uyu mukino, ndetse n’ikarita itukura yeretswe umunyezamu wa FC Szczęsny wakoreye ikosa Mbappe.
Mu guhana iri kosa Rodrygo yateye ‘coup franc’ yari hafi y’urubuga rw’amahina, ahita ayishyira mu rucundura, Real Madrid ibona igitego cya kabiri ari na cyo cya nyuma cyabonetse mu mukino.
Gutsinda Real Madrid byahesheje FC Barcelone Igikombe cya Supercopa de España, kikaba icya 15 yegukanye.
Iki ni cyo gikombe cya mbere Hansi Flick ahesheje FC Barcelona kuva yayigeramo muri Gicurasi 2024.
Uyu wabaye umukino wa gatatu wikurikiranya FC Barcelone itsinze Real Madrid nyuma y’uheruka wa Shampiyona yayinyagiye 4-0, ndetse n’uwa gicuti wabonetsemo ibitego 2-1.
Andi makipe yari yitabiriye iri rushanwa rya Supercopa de España harimo Mallorca ndetse na Athletic Club zavuyemo mu mikino ibanza.
