Umutungo wa Elon Musk usanzwe ari umunyemari wa mbere ku Isi, wiyongereyeho miliyari 34$ mu munsi umwe gusa, nyuma y’uko agaciro k’imigabane y’uruganda rwa Tesla kiyongereyeho 22%.
Imigabane ya Tesla igize 75% by’umutungo wose wa Elon Musk. Iki kigo kizobereye mu gukora imodoka zikoresha amashanyarazi, giherutse gutangaza ko inyungu yacyo mu gihembwe cya gatatu cy’uyu mwaka yiyongereyeho 17%, ugereranyije n’icy’umwaka ushize.
Muri rusange iki kigo cyagize inyungu ya miliyari 2.2$ ugereranyije na miliyari 1.9$ cyari cyagize mu gihembwe cya gatatu cy’umwaka ushize. Iki kigo cyinjije miliyari 25.2$ ugereranyije na miliyari 23.4$ z’igihe nk’icyo umwaka ushize.
Elon Musk kandi yavuze ko mu mwaka utaha, imodoka zicuruzwa na Tesla zishobora kwiyongeraho hagati ya 20% na 30%, ibyatumye abashoramari barushaho kugirira icyizere imigabane ya Tesla, bayigura ku bwinshi, agaciro kayo karazamuka.
Ku rundi ruhande, imodoka ya Cybertruck yatangiye kunguka, ibyongereye icyizere cy’abashoramari muri rusange.
Ibi byose byatumye umutungo wa Elon Musk ugera kuri miliyari 270.3$, aho yanongereye ikinyuranyo cye na Jeff Bezos umukurikira, cyageze kuri miliyari 61$.
