Ubwo yari mu gitaramo cyo kumurika album ‘25 Shades’ ya Bwiza, The Ben n’umugore we, Uwicyeza Pamella batunguwe n’abakunzi babo babahaye impano y’imyenda y’umwana bateganya kwibaruka.

Nyuma y’uku gutungurwa, Ally Soudy wayoboye iki gitaramo afatanyije na Lucky Nzeyimana yaje gusaba The Ben na Uwicyeza guhishurira abakunzi babo igitsina cy’umwana bateganya kwibaruka.

Ni ibintu byasabye ko abafana babanza gutomboza icyakora The Ben abonye bikomeje kugorana ahita afata umugore we amuririmbira indirimbo ‘True Love’ aherutse gusohora.

Uwicyeza Pamella wagaragazaga intege nke, yasabye kuva ku rubyiniro The Ben asigara aririmbana n’abafana iyi ndirimbo. Mu gihe yaganaga ku musozo yabwiye abakunzi be ko bitegura kwibaruka umwana w’umukobwa.

Ati “Ibijyanye n’igitsina cy’umwana tugiye kwibaruka byo, azaba ari umukobwa kandi tuzamwita izina rifite aho rihuriye na bino bihugu kubera Igihango tugiranye namwe.”

The Ben na Uwicyeza Pamella bari kumwe ku Mugabane w’u Burayi, aho bitabiriye igitaramo cyo kumurika album ‘25 Shades’ ya Bwiza cyabaye mu ijoro ryo ku wa 8-9 Werurwe 2025.

Uretse iki gitaramo n’ibindi The Ben ateganya gukorera ku Mugabane w’u Burayi, hari amakuru ahamya ko umugore we, Uwicyeza Pamella ateganya kuba ari naho azibarukira imfura yabo.

DALLAS – Ishami rya Leta Zunze Ubumwe za Amerika rishinzwe abinjira n’abasohoka (ICE) ryafashe Dieudonne Ishimwe, w’imyaka 38, ukomoka mu Rwanda, ushakishwa n’igihugu cye kubera icyaha cyo gufata ku ngufu, ku wa 3 Werurwe i Fort Worth, muri Leta ya Texas.

Dieudonne Ishimwe uzwi nka Prince Kid yafatiwe muri Amerika nyuma y’uko Guverinoma y’u Rwanda isohoye impapuro zimuta muri yombi, ashinjwa icyaha cyo gufata ku ngufu. Nyuma yo gufatwa, yahise ahabwa inyandiko imumenyesha ko agomba kwitaba urukiko kugira ngo hakurikizwe amategeko arebana n’iyoherezwa ry’abashakishwa mu bindi bihugu.

Josh Johnson, uyobora by’agateganyo ibiro bya ICE Enforcement and Removals Operations Dallas, yagize ati: “Abanyabyaha bahunze ibihugu byabo bagerageza kwirinda kubiryozwa bakwiye kumenya ko tuzababona.”

Yakomeje avuga ati: “ICE izakomeza gukorana ubudahwema n’inzego z’umutekano ku rwego rw’igihugu, urw’uturere n’urw’imirimo ya leta kugira ngo dufate kandi twohereze ababangamira umutekano rusange mu miryango yacu.”

Ishimwe yari atuye mu mujyi wa Fort Worth nta byangombwa bimwemerera kuhaba mbere y’uko atabwa muri yombi. Ifatwa rye ryagizwemo uruhare n’urwego rw’ubutasi rwa FBI.

Uyu mugabo yinjiye muri Leta Zunze Ubumwe za Amerika mu buryo bwemewe n’amategeko, ariko nyuma yaho arenga ku mategeko amwemerera kuhaba. Ku wa 29 Ukwakira 2024, Ubushinjacyaha Bukuru bw’u Rwanda bwamushyiriyeho impapuro zimuta muri yombi ku cyaha cyo gufata ku ngufu.

Ishimwe Vestine uririmbana na Dorcas yasezeranye mu mategeko n’umukunzi we bagiye kubana nk’umugore n’umugabo mu muhango wabereye mu Murenge wa Kinyinya mu Karere ka Gasabo.

Vestine yasezeranye n’umusore ukomoka muri Burkina Faso nk’uko amakuru atugeraho abihamya

Uyu muhango wabereye imbere y’umwanditsi w’irangamimerere kuri uyu wa 15 Mutarama 2025.

Muri uyu muhango nta muntu n’umwe wari wemerewe gufata amashusho cyangwa amafoto nk’itegeko ryatanzwe n’abareberera inyungu z’uyu muhanzikazi muri muzika.

Amakuru twamenye ni uko mbere yo gusezererana mu mategeko hara habanje umuhango wo gufata irembo wabaye ku wa mbere tariki 6 Mutarama 2025.

Uyu muhango wo kuri uyu wa Gatatu watumiwemo abantu bake cyane barimo abareberera inyungu z’umuhanzi Vestine banzuye ko nta n’umwe wemerewe gufata amashusho cyangwa amafoto kugira ngo umunezero w’uyu muhango utayoborwa n’ibikorwa bya buri wese.

Uyu mukobwa uzwi mu Rwanda kubera indirimbo ze zakunzwe cyane mu minsi yashize ni umwe mu bakunzwe cyane n’abatari bake mu muziki wo kuramya Imana.

Ishimwe Manoa usigaye akoresha amazina ya Alik Bulan mu muziki, yatangiye umwaka ashyira hanze indirimbo nshya yise “Sad Feelings”.

Uyu musore kuri ubu uri mu bahanzi bakorera muzika hanze y’u Rwanda batanga icyizere cyo kuzagera kure, yashyize hanze indirimbo nshya igaruka ku nkuru y’ibyiyumviro benshi bahisha iyo bakumbuye abo bakunda mu gihe batandukanye batabishaka.

Ni indirimbo ifite umwihariko utandukanye n’izindi uyu musore yari asanzwe akora, uretse kuba icurangitse neza ifite n’umwihariko wo kugira amashusho meza ari ku rwego mpuzamahanga.

Nubwo iyi ariyo ndirimbo yambere Alik Bulan ashyize hanze muri uyu mwaka wa 2025, avuga ko ari integuza ku bakunzi be kuko arimo kubategurira album izaba igizwe n’indirimbo ziryoheye amatwi yabo.

Ati “Abakunzi ba Alik Bulan mubabwire ko aribwo dutangiye, bitegure kuko imiziki iri imbere niyo myinshi kandi myiza na album iri mu nzira”.

Indirimbo “Sad Feelings” isohotse ikurikiye izindi nka “Bend Rmx” yakoranye na Vex Prince n’iyitwa “Chanella” zose ziboneka ku rubuga rwa YouTube rwa Alik Bulan.

Reba hano amashusho y’indirimbo nshya “Sad Feelings” ya Alik Bulan

Umuhanzi Passy Kizito wahoze mu itsinda rya TNP, ubu akaba yikorana ku giti cye, ashobora gukora umwuga w’itangazamakuru kuri imwe muri Radio zo mu Rwanda.

Uyu muhanzi uherutse gushyira hanze indirimbo yise ‘Golo’ ikanakundwa n’abatari bacye, ari ku rutonde rw’abatsindiye imyanya y’abakozi nk’abanyamakuru kuri Radio ya Magic FM, ibarizwi mu bitangazamakuru by’Ikigo cy’Igihugu cy’Itangazamakuru RBA.

Uku gutsinda ikizamini muri RBA, bigaragazwa n’inyandiko yerekana abatsindiye imyanya ya Producer na Presenter, aho Passy [Kizito Pascal] ari afite amanota 79%.

Passy aza kuri uyu mwanya akurikira uwitwa Uwingabire Annick, we ufite 80%, ku mwanya wa gatatu hakazaho uwitwa Sebushishi Beaugard na Migambi Gilbert, bombi basanzwe muri iki Kigo cy’Igihugu cy’Itangazamakuru.

Passy Kizito ntiyakunze kumvikana mu mwuga w’Itangazamakuru cyane, uretse kuba yarigeze gukora kuri Radio na TV1 ariko ntiyahatinze kuko yahise arisezera asubira muri muzika.

Nubwo atakunze kumvikana akora uyu mwuga w’itangazamakuru, ni wo yize, dore ko anafite impamyabumenyi y’icyiciro cya kabiri cya kaminuza mu Itangazamakuru.

Aramutse yinjiye muri uyu mwuga, yaba abaye umwe mu bahanzi banakora Itangazamakuru, barimo n’abafite amazina akomeye, nk’umunyamakuru Uncle Austin, Yago Pon Dat, ndetse na Andy Bumuntu we uherutse gutandukana n’igitangazamakuru yari amazeho imyaka ibiri.